Informashon di Wikipedia.

• 
  Teknologia (griego: τέχνη: "artesano" i λογία: "teoria") ta e sèt di téknika, abilidat, método i proseso ku ta wòrdu usá pa produsí produkto i servisio, òf pa logra un meta, manera investigashon sientífiko. Teknologia ta manifestá su mes den ophetonan físiko i den formanan organisatorio. E ta parti di sosiedat i ta desaroyá den konekshon estrecho ku otro ekspreshonnan humano. E forma mas simpel di teknologia ta e desaroyo i uso di hèrmènt. Despues di e deskubrimentu prehistóriko di kontrol di kandela, i e revolushon neolítiko despues, hende a haña mas kontrol riba nan fuentenan di kuminda a traves di e uso di hèrmèntnan. E invenshon di e wiel a permití hende biaha i influensiá medio ambiente mas tantu. Desaroyonan teknológiko despues, manera e invenshon di e mashin di druk, telefon i internet, a permití hende komuniká ku otro riba distansianan mas grandi. Teknologia ta sostené ekonomianan avansá i ta un komponente sentral di bida diario, tantu na pia di trabou komo den tempu liber. Hopi proseso teknológiko ta produsí produktonan sekundario indeseá (polushon). Inovashonnan den teknologia ta influensiá balornan denter di un sosiedat i hopi be ta lanta preguntanan étiko. Por ehèmpel, e oumento di e konsepto di efisiensia pa loke ta trata produktividat humano, òf retonan nobo denter di bio-étika. Desde e revolushon industrial, debatenan filosófiko a surgi tokante e uso di teknologia. Tin desakuerdo tokante si teknologia ta mehorá òf empeorá e kondishon humano. Neo-luddismo, anarko-primitivismo, i otro movementunan reakshonario ta kritiká e omnipresensia di teknologia, argumentando ku e ta daña medio ambiente i ta oumentá alienashon sosial. Un ideologia manera transhumanismo ta mira progreso teknológiko komo benefisioso pa humanidat i sosiedat.