Informashon di Wikipedia.

• 
  Pastechi ta un un mansa yená i hasá den forma di un mitar luna. E ta un tradishon kulinario di e islanan ABC, i ta wòrdu sirbí komo desayuno òf snèk. Pastechi tambe por referi na un plato di fornu manera ta wòrdu menshona den Esperanza News di 21 di aprel 1966. Asina nan ta referi na un reseta di pastechi di batata, kual ta un pyrex ku dos kapa di batata na e bòm i tòp, i ku un kapa meimei yená ku karni. E palabra "pastechi" ta derivá di e sustantivo hulandes pastei òf pasteitje. Pastechi ta similar na un empanada, ounke e empanada su mansa ta di hariña di maishi, mientras cu e pastechi su mansa ta traha ku hariña blanku. E pastechi ta reflehá e diferente influensianan étniko i kulinario di e islanan. Entre e tres islanan por tin variashon den ingrediente i su preparashon. E sabor di e mansa di pastechi tin e tendensia di bira poko dushi. E yená tambe por ta bastante variá, inkluyendo karni, kuminda di laman (entre otro bakiou, tuna, kabaron), berdura òf keshi. E yená tambe por wòrdu mesklá ku otro ingredientenan manera siboyo, promentòn, sèldu, rasenchi, kumino i alkapara. Na e islanan ABC ta haya kumpra pastechi, partikularmente parti mainta, den snèkbar, panaderia of snèktruk kanto di kaminda. Asta algun di e mihó restorantnan riba e islanan ta sirbi'é. Pastechi ta ser sirbí tambe na fiesta; esakinan tin e tendensia di ta mas chikitu ku esnan kumprá ku un diameter di mas o ménos 10 centimeter.