Papiamentu ta un idioma krioyo afro portugues. E ta e lenga materno i esun mas papiá pa setenta porshento di e poblashon di Aruba (papiamento), Boneiru (papiamen) i Kòrsou. E ta ser papiá tambe den komunidatnan di diáspora, manera Sint Maarten, Hulanda, Bélgika, i Merka. Papiamentu ta funshoná komo e idioma nashonal, un ròl sentral den e identidat kultural di e islanan i ta kontribuí na e unifikashon di e diferente grupo di poblashon.
Internashonalmente papiamento tin rekonosimentu linguístiko i ta klasifiká bou di kódigo ISO 639-1: pap. Ethnologue ta nombra papiamento komo idioma makro ku variashon den ortografia i uso. E ta rekonosí pa Glottolog, UNESCO, i ekspertonan linguístiko komo un idioma krioyo stabil ku un bida aktivo.
Riba e islanan ABC, Papiamentu tabata parti di e movementu mas grandi di emansipashon. Rekonosementu komo idioma ofisial, oumento di status, standardisashon, mas publikashon i introdukshon di Papiamentu den enseñansa awe ta ser konsiderá logronan importante den e lucha pa rekonosementu i desaroyo di e idioma.