Informashon di Wikipedia.

• 
  Trahamentu di Kontra ta un di e ekspreshonnan spiritual di folklor antiano karibense ku tin su raisnan fuertemente ankra den suela afrikano. Paketenan chikí ku funshon di talisman pa protehá bida di esun ku ta kargu’é o pa protehá bida i salú di muchanan resien nasí. Tambe pa trese suerte o atraé amor pa e sekso femenino o maskulino. Riba tur isla di Antia ta topa e talisman portátil aki, di kua su orígen ta definitivamente kongoles. Investigashonnan kondusí pa antropólogonan manera e merikano, Robert Farris Thompson i e kongoles, Fu-Kiau Bunseki a demostrá ku talismannan manera e ‘kontra’ antiano ta bini bek den tur kultura i ekspreshonnan folklóriko di paisnan di Karibe i di Sentro i Sur Amérika unda nos antepasadonan di orígen kongoles a establesé. Na Brazil por ehèmpel, tipo di talismannan asina ta konosí komo ‘ponto de segurar’. Na Cuba tipo di talisman manera e ‘kontra’ antiano tin e nòmbernan di orígen kikongo ‘Makuto’ òf ‘Nkisi’, miéntras ku na Haiti nan a haña e nòmber franses ‘pacquet kongo’.