Informashon di Wikipedia.

• 
  Kompa òf kompas (haitiano: konpa direk òf konpa) ta un género musikal bailabel, ku ta originá na Haiti. E género a wòrdu kreá meimei di añanan 1950 pa e saksofonista i guitarista haitiano Nemours Jean-Baptiste. Kompa ta okupá un luga sentral den bida sosial di Haiti i ta ser konsiderá un simbolo di identidat i orguyo nashonal. E género ta un meskla di varios influensia musikal. E ta parsialmente derivá di merengue i kuadril haitiano, i tambe di otro género haitiano, twoubadou, miéntras ku e ta integra elementonan di jazz i música kubano. E resultado ta un estilo rítmiko, elegante i fasil pa baila. Kompa ta karakterisá pa un ritmo kontinuo i un areglo musikal ku ta inkluí un sekshon di ritmo (konga, kampana i drum), baho i sintetisador, komo tambe un sekshon di instrumento di supla. Guitara, hopi biaha dos, tin un ròl importante den e patronchinan rítmiko kompleho di kompa. E letra ta lanta temanan manera libertad, amor, resistensia i pas. Na desèmber 2025, kompa a wòrdu inskribí riba e lista representativo di UNESCO komo un Herensia Kultural Inmaterial di Humanidat..